मुक्ताईनगर तालुक्यातील निमखेडी खुर्द शाळा वाऱ्यावर; ७१ विद्यार्थी आणि केवळ ‘एकच’ मुख्याध्यापक!
मुक्ताईनगर (प्रतिनिधी): तालुक्यातील पी.एम.श्री. जिल्हा परिषद प्राथमिक शाळा, निमखेडी खुर्द येथील शैक्षणिक व प्रशासकीय व्यवस्था अक्षरशः वाऱ्यावर असल्याचे समोर आले आहे. तब्बल ७१ विद्यार्थ्यांचे भविष्य अंधारात असून, संपूर्ण शाळेचा भार गेल्या तीन महिन्यांपासून एकाच मुख्याध्यापकावर, श्री. अरुण औंकार सवर्णे यांच्या खांद्यावर पडला आहे. जोपर्यंत शाळेला नवीन शिक्षक मिळत नाही, तोपर्यंत सोमवारपासून शाळा बंद ठेवण्याचा इशारा माजी सरपंच दीपक साळुंखे यांनी दिला आहे.
काय आहे नेमकी समस्या?
विद्यार्थी आणि शिक्षकांचे असमतोल गुणोत्तर:
शाळेत एकूण चार वर्ग असून ७१ विद्यार्थी शिक्षण घेत आहेत. नियमानुसार शाळेत तीन शिक्षक असणे आवश्यक असताना, प्रत्यक्षात केवळ एकच मुख्याध्यापक कार्यरत आहेत.
प्रशासकीय कामांचा अतिभार:
एकate शिक्षक असल्याने अध्यापनासोबतच मध्यान भोजन योजना, विविध शासकीय माहिती सादर करणे, पोर्टलवरील कामे आणि पीएम.श्री. योजनेचे उपक्रम राबवताना मुख्याध्यापकांची प्रचंड ओढाताण होत आहे.
मुख्याध्यापक सेवानिवृत्तीच्या उंबरठ्यावर:
सद्यस्थितीत कार्यरत असलेले मुख्याध्यापक हे मधुमेह (Sugar) आणि रक्तदाब (BP) या आजारांनी त्रस्त असून, आगामी **३० सप्टेंबर २०२६ रोजी ते सेवानिवृत्त** होत आहेत. त्यांच्याकडे अवघे तीन महिने सेवा शिल्लक राहिली आहे.
पालकांमध्ये तीव्र रोष आणि दाखले मिळण्यात अडचण
एकाच शिक्षकावर सर्व ताण असल्यामुळे शाळेत नवीन विद्यार्थ्यांचे दाखले देणे शक्य होत नाही. पालकांकडून दाखल्यांची मागणी होत असली तरी ती पूर्ण करता येत नसल्याने पालकांमध्ये तीव्र नाराजी पसरली आहे. विद्यार्थ्यांचे शैक्षणिक नुकसान होऊ नये म्हणून तातडीने अतिरिक्त शिक्षक नेमण्याची मागणी पत्राद्वारे गटशिक्षणाधिकाऱ्यांकडे करण्यात आली आहे.
माजी सरपंचांचा आक्रमक पवित्रा: सोमवारपासून शाळा बंदचा इशारा!
या गंभीर प्रकरणाची दखल घेत माजी सरपंच दीपक साळुंखे यांनी प्रशासनाकडे मागणी केली आहे.
“गेल्या तीन महिन्यांपासून शाळा एकाच शिक्षकावर सुरू आहे. विद्यार्थ्यांचे भविष्य धोक्यात आले असून, शासनाच्या विविध योजनांचा निधी आणि कामकाज एकाच व्यक्तीने कसे सांभाळावे? सोमवारपर्यंत शाळेला शिक्षक न मिळाल्यास आम्ही तीव्र आंदोलन करत सोमवारपासून शाळा बंद ठेवू असा इशारा माजी सरपंच दीपक साळुंखे यांनी दिला आहे.
