मुक्ताईनगरातील त्या बिबट्याची सातपुड्यात ‘घरवापसी’
वैद्यकीय तपासणीनंतर वनक्षेत्रात मुक्त; ४८ तास होते विशेष निगराणीत
मुक्ताईनगर (प्रतिनिधी):
शासकीय विश्रामगृहाच्या परिसरात जेरबंद करण्यात आलेल्या मादी बिबट्याला अखेर सातपुड्याच्या विस्तीर्ण वनक्षेत्रात सुरक्षितपणे सोडून देण्यात आले आहे. ४८ तासांच्या सखोल वैद्यकीय निगराणीनंतर हा निर्णय घेण्यात आला.
आरोग्य तपासणी व विलगीकरण
रविवारी ताब्यात घेतलेल्या या बिबट्याला सुरक्षित स्थळी विलगीकरण कक्षात ठेवण्यात आले होते. पशुवैद्यकीय अधिकाऱ्यांमार्फत त्याची आरोग्य तपासणी करण्यात आली. बिबट्याला कोणतीही शारीरिक दुखापत नव्हती. त्याची पचनशक्ती आणि शिकारीची क्षमता तपासण्यासाठी त्याला ठराविक आहार देण्यात आला होता. सर्व निकष समाधानकारक आढळल्यानंतर डॉक्टरांनी त्याला नैसर्गिक अधिवासात सोडण्यासाठी हिरवा कंदील दाखवला.
असा झाला मुक्त संचार
वनविभागाने विशेष वाहनाद्वारे बिबट्याला सातपुड्याच्या संरक्षित वनक्षेत्रात नेले. पिंजरा उघडल्यानंतर या मादी बिबट्याने सुरुवातीला काही काळ आजूबाजूच्या परिस्थितीचा अंदाज घेतला. परिसर पूर्णपणे शांत असल्याची खात्री होताच, तिने मोठ्या ऐटीत पिंजऱ्याबाहेर झेप घेतली आणि क्षणातच घनदाट झाडीत पसार झाली.
विश्रामगृहासारख्या वर्दळीच्या ठिकाणी आढळलेल्या या बिबट्याला कोणतीही इजा न होता सुरक्षितरीत्या जंगलात सोडल्याने वनविभागाच्या कामगिरीचे कौतुक होत आहे.
