सोने-चांदीच्या दरातील तेजीला ब्रेक; सोन्यात तीन हजारांची घसरण
आंतरराष्ट्रीय बाजारातील घडामोडींमुळे बाजारात घसरण; जळगावसह दिल्ली सराफा बाजारात दर उतरले
सोने-चांदीची खरेदी करू इच्छिणाऱ्या ग्राहकांसाठी दिलासादायक वृत्त असून, गेल्या काही दिवसांपासून सुरू असलेल्या दरवाढीला अखेर ब्रेक लागला आहे. अमेरिकेतील चलनवाढीच्या दरामुळे आंतरराष्ट्रीय घडामोडींचा थेट परिणाम होऊन सोन्याच्या दरात तीन हजारांची, तर चांदीच्या दरातही मोठी घसरण झाली आहे.
जळगावसह देशभरातील बाजारात गेल्या २४ तासांत सोने आणि चांदीच्या किमतीत मोठी घट नोंदवली गेली आहे. जळगाव सराफा बाजारात सोन्याचे दर प्रति १० ग्रॅम ₹१,६३,००० वरून ₹१,६०,००० वर खाली आले आहेत. तर चांदीच्या दरातही ₹५,००० ची घसरण होऊन ₹२,५०,००० वर असलेले दर ₹२,४५,००० प्रति किलोवर आले आहेत. हे दोन्ही दर जीएसटी (GST) व्यतिरिक्त आहेत. यामुळे गेल्या चार दिवसांपासून सुरू असलेली तेजी थांबली असून बाजारात स्थिरता दिसून येत आहे.
दिल्ली सराफा बाजारातही बुधवारी सोन्याचे दर ₹६०० ने घसरून प्रति १० ग्रॅम ₹१,६६,५०० वर आले, जे काल ९९.९% शुद्धतेसाठी ₹१,६७,१०० वर बंद झाले होते. दुसरीकडे, ऑल इंडिया सराफा असोसिएशननुसार दिल्लीत करांसहित चांदीचा भाव ₹५०० ने वाढून ₹२,५०,५०० प्रति किलोग्राम झाला आहे.
इस्टर्न हेराल्डच्या अहवालानुसार, २४-कॅरेट सोन्याचा आधारभूत भाव प्रति ग्रॅम ₹१६,२०० आणि २२-कॅरेटचा भाव ₹१४,८५० नोंदवला गेला. जागतिक स्तरावर अमेरिकेच्या वैयक्तिक उपभोग खर्च (PCE) निर्देशांकात जुलै महिन्यात ३.७% वाढ झाली आहे. ही वाढ फेडरल रिझर्व्हच्या २% च्या उद्दिष्टापेक्षा जास्त असल्याने स्पॉट सोन्याचे भाव तीन महिन्यांच्या उच्चांकावरून घसरून प्रति औंस $४,६३३ वर आले आहेत.
नेमकं प्रकरण काय?
अमेरिकेचा चलनवाढ दर ३.७% वर राहिल्याने तेथील फेडरल रिझर्व्ह सप्टेंबरच्या बैठकीत व्याजदर वाढवण्याची शक्यता निर्माण झाली आहे. त्यामुळे गुंतवणूकदारांनी सोन्यातील पैसे काढून ते बॉण्ड्स आणि डॉलरमध्ये गुंतवल्याने सोन्या-चांदीच्या जागतिक व स्थानिक दरात ही मोठी घसरण झाली आहे.
बाजारातील आजचे मूळ भाव
कर व अतिरिक्त शुल्कांशिवाय सोन्याच्या आधारभूत किमतीत घट झाली आहे. बुधवारी २४-कॅरेट सोन्याचा भाव प्रति १० ग्रॅम ₹१,६२,००० वर आला, जो काल ₹१,६३,७४० इतका होता. प्रति १० ग्रॅममागे ₹१,७४० ची थेट घट नोंदवण्यात आली आहे.
