दिल्लीतील जंतर-मंतरवरील लाठीहल्ल्याविरोधात मुक्ताईनगरात आक्रमक मोर्चा; केंद्रीय शिक्षणमंत्र्यांच्या राजीनाम्याची मागणी!
विविध सामाजिक व विद्यार्थी संघटनांचे जोरदार प्रदर्शन; तहसीलदारांना निवेदन देत सात दिवसांचा अल्टीमेटम
मुक्ताईनगर प्रतिनिधी : -दिल्लीतील जंतर-मंतर येथे ‘नीट’ (NEET) पेपरफुटी प्रकरणाच्या विरोधात शांततापूर्ण आंदोलन करणाऱ्या विद्यार्थ्यांवर झालेल्या अमानुष लाठीहल्ल्याचे तीव्र पडसाद आता मुक्ताईनगरमध्ये उमटले आहेत. या घटनेच्या निषेधार्थ गुरुवारी मुक्ताईनगरात विविध सामाजिक, विद्यार्थी आणि राजकीय संघटनांच्या वतीने एक भव्य आणि आक्रमक निषेध मोर्चा काढण्यात आला. केंद्र सरकारविरोधात जोरदार घोषणाबाजी करत यावेळी केंद्रीय शिक्षणमंत्री धर्मेंद्र प्रधान यांच्या तात्काळ राजीनाम्याची मागणी करण्यात आली.
प्रवर्तन चौकातून निघाला भव्य मोर्चा
सकाळच्या सत्रात शहरातील प्रवर्तन चौकातून या मोर्चाला मोठ्या उत्साहात व शिस्तीत सुरुवात झाली. प्रवर्तन चौक, भुसावळ रोड आणि संताजी नगर मार्गे हा मोर्चा थेट तहसील कार्यालयावर धडकला. या मोर्चानिमित्त प्रवर्तन चौकात एका विशेष स्वाक्षरी मोहिमेचे आयोजन करण्यात आले होते, ज्यामध्ये नागरिकांनी मोठ्या संख्येत सहभाग घेतला. मोर्चादरम्यान शेकडो महाविद्यालयीन विद्यार्थी-विद्यार्थिनी, तरुण आणि विविध क्षेत्रांतील नागरिक हातात फलक घेऊन सहभागी झाले होते, ज्यामुळे संपूर्ण परिसर विद्यार्थ्यांच्या समर्थनार्थ दुमदुमून गेला.
प्रशासनाला निवेदन आणि मागण्यांचा पाढा
मोर्चानंतर मुक्ताईनगरचे तहसीलदार गिरीश वखारे यांना विविध मागण्यांचे एक विस्तृत निवेदन सादर करण्यात आले. निवेदनात नमूद करण्यात आले की, २० जुलै रोजी दिल्ली येथे सामाजिक कार्यकर्ते सोनम वांगचुक व अभिजित दीपके यांच्या नेतृत्वाखाली नीट पेपरफुटीविरोधात सुरू असलेल्या शांततापूर्ण आंदोलनावर पोलीस, आर.ए.एफ. (RAF) जवान आणि काही असामाजिक घटकांनी केलेल्या कथित लाठीचार्जचा निषेध नोंदवण्यात आला.
निवेदनातील प्रमुख मागण्या:
📍 या संपूर्ण प्रकरणाची उच्चस्तरीय चौकशी करून दोषींवर कठोर कायदेशीर कारवाई करण्यात यावी.
📍 लाठीहल्ल्यात जखमी झालेल्या विद्यार्थ्यांना तात्काळ योग्य वैद्यकीय उपचार मिळावेत.
📍 आंदोलनादरम्यान मृत पावलेल्यांच्या कुटुंबीयांना यथोचित आर्थिक नुकसानभरपाई दिली जावी.
📍आंदोलक विद्यार्थ्यांवर दाखल करण्यात आलेले गुन्हे तात्काळ मागे घेण्यात यावेत.
📍विद्यार्थ्यांच्या लोकशाही हक्कांचे पूर्ण संरक्षण करून भविष्यात अशा घटना पुन्हा घडणार नाहीत, याची शासनाने हमी द्यावी.
तसेच, प्रशासनाला सज्जड इशारा देण्यात आला आहे की, जर येत्या सात दिवसांच्या आत यावर कोणतीही ठोस व योग्य कारवाई झाली नाही, तर मुक्ताईनगर तालुक्यात अधिक तीव्र स्वरूपाचे व्यापक जनआंदोलन छेडण्यात येईल.
दिग्गजांचे मार्गदर्शन आणि विविध संघटनांचा सहभाग
या यशस्वी आंदोलनात आणि जाहीर सभेत मानवाधिकार संघटनेचे जिल्हाध्यक्ष मोहन मेढे, काँग्रेसचे जिल्हा प्रवक्ते ॲड. अरविंद गोसावी, मुस्लिम मन्यार बिरादरीचे हकीम चौधरी, विद्यार्थिनी सिद्धी राणे, ॲड. चेतन झनके, ॲड. कुणाल गवई, ॲड. पवन पाटील, ॲड. राहुल पाटील आणि प्रमोद सौंदळे यांसह अनेक मान्यवरांनी उपस्थितांना मार्गदर्शन केले व विद्यार्थ्यांच्या पाठीशी खंबीरपणे उभे राहण्याची भूमिका मांडली.
या आंदोलनाला काँग्रेस पक्ष, शिवसेना (उबाठा), ऑल इंडिया पँथर सेना, आंतरराष्ट्रीय प्रारंभिक मानवाधिकार संघटना, भारत मुक्ती मोर्चा, मुस्लिम मन्यार बिरादरी आदी विविध राजकीय व सामाजिक संघटनांनी सक्रिय सहभाग नोंदवत आपला पाठिंबा दर्शवला. विद्यार्थ्यांच्या हक्कांचे रक्षण आणि परीक्षा व्यवस्थेतील पारदर्शकतेसाठीचा हा लढा मुक्ताईनगरमध्ये एकजुटीने पुकारला गेला आहे.
मुक्ताईनगर शहरात कडकडीत बंदला प्रतिसाद
दिल्लीतील जंतर-मंतर येथे विद्यार्थ्यांवर झालेल्या कथित लाठीहल्ल्याच्या निषेधार्थ 23 जुलै रोजी वंचित बहुजन आघाडीच्या वतीने मुक्ताईनगर शहरात सकाळपासून दुपारपर्यंत कडकडीत बंद पाळण्यात आला. अत्यावश्यक सेवा व औषधांची दुकाने वगळता शहरातील बहुतांश व्यापारी प्रतिष्ठाने दुपारपर्यंत बंद ठेवण्यात आली. या बंदला व्यापारी वर्गानेही उत्स्फूर्त प्रतिसाद दिल्याचे चित्र पाहायला मिळाले.
यावेळी शहरातील प्रवर्तन चौकात वंचित बहुजन आघाडीच्या कार्यकर्त्यांनी निषेध सभा घेतली. सभेत केंद्र सरकार व केंद्रीय शिक्षणमंत्री धर्मेंद्र प्रधान यांच्या विरोधात जोरदार घोषणाबाजी करण्यात आली. विद्यार्थ्यांवरील कथित लाठीहल्ल्याचा तीव्र निषेध व्यक्त करत दोषींवर कठोर कारवाई करण्याची मागणी करण्यात आली. आंदोलनादरम्यान शहरात शांततेत बंद पाळण्यात आला असून कायदा व सुव्यवस्था अबाधित राहिली.
